ليه يادنيا
ليه يادنيا ليه تملي
فيكِ إللي واللي واللي
إللي ساكن فى القصور
والفقير عشا النسور
واللي باني في المباني
واللي هادد فى الجسور
واللي حاور واللي ناور
واللي نط من المناور
واللي عاش زي العناكب
راكب فوق كل المناكب
واللي حب واللي سب
واللي شاااب وهو شاب
واللي خد طمع ماودى
واللي إتخلى فى وقت شدة
واللي شرق واللي غرب
واللي أدمن لما جرب
واللي إتذل بعد عز
واللي فيكِ مالوهش حظ
واللي فى عينه بان شرار
لما داق طعم المرار
واللي دمعه بل خده
واللي إندان بدين ما ردّه
واللي يضرب شقلباظ
واللي بيته من إزاز
واللي معاه وقال معابش
واللي له وقال ماليش
واللي عاش نافش فى ريش
واللي خابز فيكي عيش
يجي ياكل مايلاقيش
هى دي كل الحكاية
من البداية للنهاية
كله يراجع تاني نفسه
يبص بصة في المراية
بقلم طارق السيد
ليست هناك تعليقات:
إرسال تعليق