■ شرع مين ■
☆ أشعار ☆
( عمادالدين العيطة )
فى شرع مين .. تغيب سنين
فى شرع مين إنك تهاجر ..
وأنا اللى فاكر إنك مسافر
هتغيب يومين ..
مش غلطتك .. غلطى أنا
مشيت وراء الشوق والحنين
كان الأمل .. وكل المنى
إنى ألاقى عندك هنا ..
فرح وهنا يملى السنين
وإنت وأنا .. يدوبنا
الشوق والحنين
ونقول لكل الدنيا ..
مين زينا
دا فى كل ثانية
حب جديد بيضمنا
لكن ياعينى .. وأه ياعين
فاجئتنى .. وصدمتنى
لما لقيت قلبك إسى
وعقلك نسى كل الوعود
وع الفراق لقيته قادر
لقيته عامل مابين ..
قلبى وبين قلبك سدود
حسيت ساعتها .. بالجراح
عرفت إن فرح عمرى راح
سابنى وسافر ..
وراح وهاجر ..
فى دنيا تانية غير دنيتى
وبقى كل أملى فى دنيتى
وأمنيتى ..
إنى أرجع تانى بقلب خالى
وأقول ياريت كان قلبى حجر
ماكانش طاوع الهوى لما أمر
لكن القدر غير لى حالى
ومين هيقدر ع القدر
والجرح غالى
فى شرع مين كل ده
فى شرع مين تقسى كده
بص فى مكانك ..
هتلاقى كل حاحة حلوة زرعتهالك
كل لحظة عشق دافية حسستهالك
ماتقولى مالك؟
إيه اللى غير كل ده
ماتقول ياعمرى ..
ياللى كنت شاغل قلبى وفكرى
ولما كنت أنده عليك تجينى تجرى
دلوقتي خدت ع البعاد ..
قادر يكون بينى وبينك بلاد
والوداد اللى مابينا ..
بدلته ليه بالعناد
والعناد دا فى شرع مين
( عمادالدين العيطة )
أزال المؤلف هذا التعليق.
ردحذف