جنة ..أو نار ـ الشاعر #جمال_نصير

طبعا إنتوا إتعودتم على قصايدي الطويلة

ومش هقول لكم زى كل مرة كملوها للاخر 

لانكم هتكتشفوا ان جمالها فى نهايتها

بلاش كسل وكملوا الله يهدينى ويهديكم

بعنوان

جنة ..أو نار

......................

رحلة حياتنا اتلخصت...

ف كام محطة معدودين

ما بين دقايق...أو سنين

إتنين على ضهر الحياة

واتنين على فيض الكريم...

مستبشرين

*****

(الرحلة الأولى)

من ضهر أبويا لبطن أمي ....

ف كام دقيقة مسلطنين

ولا لينا حس ولا خبر ...

ولا أى رأى ف أى شئ...

ولا حتى ف حساب البشر..

م المحسوبين

فجأة نكون...!!

طب كنا فين.. طب إحنا مين...

طب أيه هناخد م السنين...؟؟

مش دريانين...

*****

(الرحلة الثانية)

من بطن أمي لدنيا تانية..

وتبتدى....رحلة أنين

تيجي بدموع.. ساعة لقانا بسكة الدرب ال حاير...

بين خطانا وبين قدر..

مكتوب لنا فوق الجبين

ندخل على فصل المحبة..

والشقاوة..

وقال حياة المغرمين

واحنا يادوب ...متبعترين

و تتوه مشاعر قلبنا المغلوب ف رحلة عمرنا...

يقف الطريق...

ناخد نفسنا حبتين

والقطر هكمّل لوحده سكته..

مع خلق تانية مكملين

واحنا خلاص ..مترحلين...

طب كنت مين..؟؟

طب فين حبايبي وفين صحابي..

وفين قرايبي المخلصين..؟؟

مفيش جواب...

غير لما تبدأ رحلتى التالتة وانا...

حبة عظام...متجمعين

******

(الرحلة الثالثة )

هنروح لعام مش بنعرف منتهاه

لما نسيب ضهر الحياة 

وأسيب جميع إل جريت دايما وراه

شايل على كتافي جبل

حبة حقوق

حبة ذنوب

حبة ف تقصير العمل

وافضل هناك تايه مابين لحظة ندم..

لحظة أمل...

ومعايا كل المخلوقات.. المرعوبين

******

(الرحلة الرابعة)

هنقوم سوا..متسربعين

كل الخلايق تتزحم..

و نلاقي روحنا ف سكتة واحدة

وكلنا ...متجمعين

واقفين على باب الاله مستنيين

لحظة حساب

لا فيه صنم

ولا فيه بقر

ولا حاجة من ريحة العباد المجرمين

مفيش يتدوب الا الاله...

الله..

ولا معبود سواه

تاخد حسابك باليمين..أو بالشمال..

والعدل هيكون الحكم...على أى حال

بعد انتهاء المحكمة

راح نفترق...حزبين يادوب..

ناخد جزانا من سكات..

لا تقول راح أرجع...أو أتوب

*****

فاختار طريقك يا بن أدم من هنا

ف الدنيا دى...

نقدر نقرر فين نروح..

ونشوف تفاصيل دربنا

جنة ...ونار

وعليك يا صاحبي.. الاختيار

*****

#جمال_نصير

26 نوفمبر 2017