كتير كلام بقلم / همس الشريف
كفايه بقا كتير كلام
عشنا سنين فى اﻷوهام واﻻحﻻم
قالولنا بكره احلى والدنيا لينا هتحلا
نمنا وفرحنا وحلمنا ببكره
قولنا خلاص هتتحقق احلامنا
وكل واحد جاب كراسه ورسم فيها احلامه وامانيه
وبيته اللى فى خياله هيبنيه ومستقبله زى مابيحلم بيه هيلاقيه
وفوقنا ......وفوقنا ويارتنا مافوقنا
صبحنا على صراخ وخبط باب
احلامنا بقت هباب وايامنا اسود من السواد
فقر وظلم واستبداد وعدى قطار العمر وفات
فين....فين الوعود والأحلام
كدب كلام فى كلام
سم معسول وضحك على العقول
واحنا صدقنا وفرحنا وحلمنا ببكره أحلا
غريق بيتعلق بقشه يا مستنى السمنه من بطن النمله فوء
اصحى من الأحلام والأوهام واهرب من الزحام
و اقف فى وش الطغيان والاستبداد وبلاش استسلام
اصرخ وقول لا أنا انسان ليا كيان واحلام
مش هسمح لحد مهما كان يقتلنى ويهدنى
وفي بيتى وارضى يذلنى
هحقق احلامى بعزمى وقوتى وربى قادر على نصرتى
ليست هناك تعليقات:
إرسال تعليق