{مفردات البوح و شجون الخاطرة} ..
من يوميات فتاةٍ صابرة
---------------
زمان قالو النصيب غلاب
و انا من بَدري بَستنَّي
و اقول إمتي يدُق الباب
و بحلم زَي بنات سِنِّي
بفرحة و أهل بتغنِي
وناس جيالي بتهنِي
وصوت زغروطة م الأحباب
و اقول امتي ؟
ح ييجي البخت يِندَهني
و ألقي نفسي مطلوبة
لـِ فتحة وشبكة و خطوبة
ومن بعديها كَتب كتاب
خيالي كان بيسبقني
إذا مرة قريت قِصّة
و انام و اصحي و انا لِسّة
محاوطني شرود الفكر
و أعيش الحلم بالأيام
تآنِس وحدتي الأوهام
و اشوف نفسي أميرة القصر
و ييجي فارس الأحلام يطير بيا
و أنا و هوا سوا ع المُهر
و ألَوِّن صورة فُوق صورة
بـ حِبر و ريشة مكسورة
و الاقي الصورة وخداني
لأمنيّة سريعة تِمُر
لـ ليلة بيحكو عنها الناس
وبيسموها ليلة العمر
و انا ف الكُوشة ست الكل
و فُستاني جميل أبيض
و مِتعطَّر بريح الفُل
و ناس حواليا بابتسامات
و ناس ماسكة صواني الوَرد
دايرة توزع الشربات
و ناس عن قُرب بتبارك
و ناس ف الفرحة بتشارك
عيونها فيها نظرة وِد
شايلة أطيب الدعوات
بيتمنولي أتهنَّي
و تِبقي دُنيتي جَنَّة
أعيش فيها فـ تبات و نبات
و بيت السعد يجمَّعنا
و فرح الدنيا ما يسعنا
حوالينا ملايكة نور
بيتسابقو بنين و بنات
و تبقي حكايتي أحلي حكاية
يحكوها بين الحكايات
و تيجي ايام وراها سنين
وانا صابرة و اقول بُكرة
ح تتحقق مُني نفسي
وساعات الانتظار المُر
تصبح كلها ذِكري
و مهما يقولو فاتها القَطر
وصفحتها ف أخر سَطر
إله الكون كاتبلي الخير
و دَه وعدُه اللي أنا فاكرة
أنا لِسة نصيبي مجاش
لا انا يائسة ولا ناكرة
أنا راضية بِمَقسومي
و حامدة ربنا و شاكرة
.............................م/علاء زايــــد
ليست هناك تعليقات:
إرسال تعليق