دايما حاير
بقلم الشاعر / طه ابراهيم
*********
قلبي مشتت دايما حاير
عامل زي الكعب الداير
دمي بيغلي ف جسمي وفاير
ماشي ف سكه لوحدي وشايل
دمعي بينزف يملي شكاير
مره أطلع غُلّبي ف نفسي
ومره أطلع غِيظي سجاير
ومره أكوع جوه سريري
وأقفل بابي وأي ستاير
رافض أشوف الناس قدامي
عايش جوه الحلم وطاير
خايف حد يزود همي
عامل زي الفرخ الحاير
شفت الحيره قدام عيني
ياما وياما وياما خساير
ياما فرحت كتير من قلبي
اكبر فرحه ف شهر يناير
شفت الحلم بيرقص فوقي
شفت أخويا وأبويا الثاير
شفت طموحي قدام عيني
شفت بعيني الزمن الجاير
شفت جراح ف السكه كتير
شفت الناس ف الشدة تعاير
شفت الفرقه بتاكل فينا
لما بقينا اللحم الباير
ايوه أنا خايف يجي يناير
يجي يلاقي خصام وعداوه
يرفض يجي أو يتساير
يزعل يغضب يمشي ويرحل
يرفض يبعت أي بشاير
***********
بقلم / طه إبراهيم
ليست هناك تعليقات:
إرسال تعليق