شعر / محمد رضوان
بحتاج لحاجات كتير وياكي ..
زي اي حد بيحب
بحتاج حضن احس وياه اني عايش ..
مش رقم في الدنيا ع الهامش ..
بحب أطول في حضنك اوي ..
واقفل عليكي عيوني ..
احس اني طفل محتاج لحنانك ..
أو حتي صفحة في ايدك
من جرنالك ..
احس اني عصفور علي شباكك ..
والماية ترويني من ايدك ..
بحتاج وقت الجنون كمان جنانك ..
صوتي وصوتك العالي ..
وبعد الجنان حضن أمان
ننسي فيه الكون ..
وانسي اني كنت مجنون ..
بحب ايدي تلمس خدودك ..
حتي لو اتبلت من دموعك ..
والمس شعرك بكفي ..
واقولك ده يكفي ..
وتقولي ضم كمان ضلوعي ..
بحتاج اكتب عنك كتير ..
وتعرف الناس إن حبك كبير
قلبك حاضن قلوب البشر
قلب ابيض لون القمر
والحزن عندك مات وانتحر
حنان زي موج البحر
عايشة في قلبي وقت السفر
بحتاج معاكي اسكت متكلمش
والنظرة منك تعرفني تحس
لو ضحكت بوش غير الوش
فهماني وعارفه من غير حس
محتاجك شجرة في قلبي
طارحه المودة وباني فيها العش
والصراحة منك واضحة
مش زي غيرك دايما غش
انتي عارفة ليه بحبك ؟
.. والا مش عارفة
انتي الوحيدة اللي قلبك
متلونش ........
ليست هناك تعليقات:
إرسال تعليق